ജാലോർ: അമിത വേഗതയിലെത്തിയ ഇന്നോവ കാറിടിച്ച് അഞ്ച് കുട്ടികൾ മരിച്ചു. ഒരു വിദ്യാർഥിക്ക് ഗുരുതരമായി പരിക്കേറ്റു. രാജസ്ഥാനിലെ ജാലോറിലെ കർദ-റാണിവാഡ റോഡിൽ ബുധനാഴ്ച വൈകുന്നേരമാണ് സംഭവം.
സ്കൂളിൽ നിന്ന് വീട്ടിലേക്ക് നടന്നുവരികയായിരുന്ന കുട്ടികളെ അമിത വേഗതയിലെത്തിയ കാർ ഇടിച്ച് തെറുപ്പിക്കുകയായിരുന്നു. ആറു മുതൽ പത്ത് വരെ ക്ലാസുകളിൽ പഠിക്കുന്ന കുട്ടികളാണ് മരിച്ചത്. രണ്ട് കുട്ടികൾ അപകടസ്ഥലത്ത് വച്ച് തന്നെ മരിച്ചു. മൂന്നു പേർ ആശുപത്രിയിലേക്കുള്ള യാത്രാമധ്യേയാണ് മരിച്ചത്.
രണ്ട് പേരാണ് കാറിലുണ്ടായിരുന്നത്. കാർ ഡ്രൈവറെ പോലീസ് പിടികൂടി. ഇയാൾ ലഹരിക്ക് അടിമയാണെന്നും മദ്യപിച്ചാകാം വാഹനമോടിച്ചതെന്നും ഗ്രാമവാസികൾ പറയുന്നു. ജില്ലാ കളക്ടറും എസ്പിയും സംഭവസ്ഥലത്തേക്ക് എത്തിയിട്ടുണ്ടെന്ന് വാർത്താ ഏജൻസിയായ എഎൻഐ റിപ്പോർട്ട് ചെയ്തു.
