ചെന്നൈ: കൊറോണ ഭീതിയിൽ തമിഴ് സിനിമാ മേഖലയിൽ ജോലി ഇല്ലാതായ ദിവസ വേതന ജീവനക്കാര്‍ക്ക് സഹായവുമായി നയൻതാര. 20 ലക്ഷം രൂപയാണ് ജീവനക്കാര്‍ക്കായി ഇവര്‍ ഫിലിം എംപ്ലോയീസ് ഫെഡറേഷന്‍ ഓഫ് സൗത്ത് ഇന്ത്യ(ഫെഫ്‌സി)യ്ക്ക് കൈമാറിയത്. നേരത്തെ നടി ഐശ്വര്യ രാജേഷ് 1 ലക്ഷം രൂപ നല്‍കിയിരുന്നു. സൂര്യ, വിജയ് സേതുപതി, രജനികാന്ത്, ശിവകാര്‍ത്തികേയന്‍ തുടങ്ങിയ താരങ്ങളും സാമ്പത്തിക സഹായവുമായി എത്തിയിരുന്നു. ദിവസ വേതനക്കാരായവരെ സഹായിക്കാന്‍ താരങ്ങള്‍ മുന്നോട്ട് വരണമെന്ന് അഭ്യര്‍ഥിച്ച്‌ ഫെഫ്‌സി പ്രസിഡന്‍റ് ആര്‍.കെ ശെല്‍വമണി രംഗത്തെത്തിയിരുന്നു. സാമ്പത്തിക സഹായത്തിന് പുറമെ തൊഴിലാളികള്‍ക്കുള്ള ഭക്ഷണ സാധനങ്ങള്‍ പല താരങ്ങളും എത്തിച്ചു നല്‍കിയിരുന്നു.
